Jeshi la Somalia laanzisha mpango mpya wa usalama mjini Mogadishu

Wanachama washukiwa wa al-Shabaab wakipanda gari ya polisi tarehe 10 Oktoba kusini ya Mogadishu. Idadi ya washukiwa 62 walizingirwa wakati wa usafishaji wa usalama katika mji mkuu. [Na Abdurashid Abdulle Abikar/AFP]

Na Majid Ahmed, Mogadishu

Jeshi la Somalia limeanzisha mpango mpya wa usalama mjini Mogadishu kwa msaada wa Misheni ya Umoja wa Afrika Somalia (AMISOM) ili kumaliza mabaki ya al-Shabaab waliojificha jijini.

"Vitengo maalumu vya polisi vyenye dhamana ya kuzuia mashambulizi na operesheni za kigaidi vinaanzisha mpango wa usalama ili kuisafisha Mogadishu na al-Shabaab kwenye maficho yao," alisema Jenerali Abdullahi Hassan Barise, mkuu wa uchunguzi wa jinai.

Katika usafishaji wa usalama chini ya mpango mpya, polisi hapo tarehe 10 Oktoba waliwabaini na kuwakamata mamia ya wanachama washukiwa wa al-Shabaab. "Tuliwakamata watu 360 wakati wa operesheni za hivi karibuni za usalama, lakini baada ya polisi na vikosi vya usalama kuwachunguza washukiwa hawa, tuliweza kuthibitisha kwamba watu 62 miongoni mwao ni wanachama wa al Shabaab wanaotakiwa na vikosi vya usalama wakati wale wengine waliothibitishwa kuwa hawana hatia waliachiwa huru," Barise alisema.

Maafisa wa polisi wanawake wakiangalia wakati wa sherehe za ufunguzi wa mpango mpya wa mafunzo unafadhiliwa na Misheni ya Umoja wa Afrika Somalia na Jeshi la Polisi la Somalia hapo tarehe 15 Oktoba. [Na Tobin Jones/AFP]

"Polisi pia waligundua kiwango kikubwa cha silaha, ikiwa ni pamoja milipuko, mabomu ya mikono, vifaa vya milipuko na silaha za automatiki zilizofichwa majumbani huko wilaya ya Hodan mjini Mogadishu kupitia habari zilizotolewa na wakazi wa eneo hilo,'' alisema.

Katika mpango huo mpya, ni wanajeshi na vikosi vya polisi vitaruhusiwa kumiliki na kubeba silaha mjini, isipokuwa kwa walinzi wachache wa usalama wa binafsi ambao wamepewa ruhusa rasmi na serikali ya Somalia.

Barise aliutaka umma kushirikiana na vikosi vya usalama na kutoa habari ili kusaidia usalama wa Mogadishu. "Tunawataka wakazi kuvisaidia vikosi vya usalama ili kumaliza maficho ya magaidi ambao kinyume chake wanaathiri hali ya usalama," alisema.

Kanali Ali Abdirahman, mmoja wa maafisa wa Jeshi la Usalama la Somalia anayeshughulikia operesheni katika wilaya ya Hodan, alisema kuwa baadhi ya watu 62 waliokamatwa walikuwa sehemu ya magaidi ambao walikuwa wamejificha katika maeneo ya makazi ya watu wakati wa mchana na kufanya vitendo vya ugaidi nyakati za usiku.

"Tutafanya msako katika vitongoji, nyumba hadi nyumba, kutafuta silaha ambazo hazina leseni au milipuko, hasa katika maeneo ambayo vikosi vya usalama vinashutumu kuwa wanachama wa al-Shabaab wanajificha," aliiambia Sabahi. "Operesheni hizi zitaendelea hadi wanachama wa al-Shabaab watakapoangamizwa ndani ya jiji."

Doria za usalama usiku

Kepteni wa Polisi Mohamed Ibrahim alisema kuwa mpango mpya wa usalama unajumuisha doria za usalama nyakati za usiku.

"Vitengo maalumu vya polisi vinapelekwa katika makutano makubwa ya barabara na doria inafanywa kwa muda wa masaa 24 kwa siku," aliiambia Sabahi, na kuongeza kuwa vitengo vya polisi kutoka Misheni ya Umoja wa Afrika Somalia vinashiriki katika operesheni hizo za usalama.

"Vikosi vya pamoja vya polisi vinafanya doria za usalama na uvamiaji holela dhidi ya nyumba ambazo washukiwa wa al-Shabaab na wale ambao wanapinga amani wanajificha," alisema.

Ibrahim alisema ingawaje al-Shabaab wameshindwa kijeshi, mabaki ya kikundi na wapenzi wao bado wanajificha miongoni mwa wakazi na jamii za kienyeji katika maeneo yaliyo chini ya udhibiti wa serikali.

"Vikosi vya usalama viko katika tahadhari ya hali ya juu ili kujikinga na watu wanaojificha ili wasijikusanye na kuendelea na operesheni zao za uharibifu mjini Mogadishu," alisema. "Tutaendelea na operesheni hizi mpaka mabaki ya watu hawa ambao wanapinga amani wanamalizwa mjini Mogadishu na maeneo ya karibu. Hatutasita hadi jiji na miji mengine iko salama na huru kutokana na wanachama wa al-Shabaab."

Uwekaji nambari kwenye nyumba na usajili wa wakazi wote

Mohamed Yusuf, msemaji wa meya wa jiji la Mogadishu, alisema kuwa mpango mpya wa usalama pia ni pamoja na sensa ya vitongoji vya Mogadishu na usajili wa wakazi wa jiji.

"Uwekaji nambari katika nyumba unafanywa katika wilaya tano: Hamar Weyne, Hamar Jajab, Wabari, Shangani na Bondheere," aliiambia Sabahi, na kuongeza kuwa kuweka nambari katika kila mtaa mjini Mogadishu kutasaidia kuhakikisha na kukinga usalama na utulivu wa mji mkuu.

Yusuf pia alisema kuwa wamiliki wa majumba wanapaswa kuwasiliana na vikosi vya usalama vinavyohusika kabla ya kukodisha nyumba zao kwa watu wanatiliwa shaka ili kujikinga na mabaki ya al-Shabaab wanaojificha katika majengo ya makazi ya watu.

Polisi wapiga marufuku magari yenye vioo vya giza

Askari wa trafiki pia wametoa amri ya kupigwa marufuku magari yenye vioo vya giza.

"Sheria hii ilitolewa ili vikosi vya usalama viweze kuwatambua abiria waliomo ndani ya gari hizo," Omar Hassan, afisa wa polisi wa usalama barabarani, aliiambia Sabahi, na kuongeza kuwa upigaji marufuku huo hauwajumuishi maafisa wa serikali na wabunge.

"Katika tukio ambapo dereva atakamatwa anaendesha chombo chenye vioo vya giza, tutamuamrisha kuondoa plastiki nyeusi kwenye madirisha ya magari yao," alisema. "Ikiwa watajaribu kutotimiza hilo au kujaribu kuweka plastiki nyeusi inayoganda kwenye magari yao, wataadhibiwa."