Dk Nchimbi arudi kivingine, aratibu sherehe za CCM

Songea. Mbunge wa Songea Mjini, Dk Emmanuel Nchimbi amerudi kwa kuanza kuratibu sherehe za kutimiza miaka 38 ya Chama cha Mapinduzi (CCM) kitaifa mwaka huu.

Sherehe hizo zitakazofanyika mkoani Ruvuma, mgeni rasmi anatarajiwa kuwa Mwenyekiti wa chama hicho Taifa, Rais Jakaya Kikwete. Kaulimbiu ya maadhimisho hayo ni ‘Umoja ni Ushindi, Katiba yetu nchi yetu.’

Dk Nchimbi ambaye ni Mwenyekiti wa Kamati ya Maandalizi ya sherehe hizo, alisema kila kitu kimekamilika.

Alisema Ruvuma mwaka huu imepata heshima kubwa ya kuandaa sherehe hizo itakayofanyika Februari Mosi, mwaka huu badala ya Februari tano kama ilivyozoeleka.

Dk Nchimbi ambaye amekuwa kimya kwa muda mrefu tangu alipoondolewa kwenye uwaziri, alisema mabadiliko hayo yanalenga kuwapa fursa wananchi wengi ili waweze kushiriki.

“Februari tarehe tano ni siku ya kazi, sasa tusiharibu utaratibu wa watu,” alisema Dk Nchimbi na kuongeza kuwa:

“Maandalizi ya vijana wa halaiki, uwanja na vikundi mbalimbali vya ngoma yanaendelea, vijana wa bendi kutoka Zanzibar wameshawasili na wanaendelea na mazoezi, bendi yetu ya Tanzania One Theatre (TOT) nayo itatumbuiza.

“Pia, watakuwapo wasanii mbalimbali wa muziki wa kizazi kipya wakiongozwa na Nassib Abdul maarufu kama Diamond Platinum.”

Mwenyekiti wa CCM Mkoa wa Ruvuma, Oddo Mwisho alisema chama hicho kimeendelea kusimamia miradi mbalimbali ya maendeleo kama ilani inavyoelekeza kwa lengo la kuwaletea wananchi maendeleo.

“Tumefanikiwa kwa kiwango kikubwa katika sekta ya elimu, afya, maji na miundombinu... Pia barabara nyingi zimejengwa kwa kiwango cha lami ikilinganishwa na miaka iliyopita,” alisema Mwisho.