Chadema wabainisha chanzo cha migomo

CHAMA  cha Demokrasia na Maendeleo (Chadema) kimetaja chanzo cha migomo inayoendelea nchini kuwa inatokana na mgao usio sawa wa rasimali za nchi kutokana na madaraka makubwa kuwa mikono mwa Rais.
Chama hicho kimetoa wito kwa wananchi kujitokeza kwa wingi kutoa maoni kwa Tume ya Katiba mpya iliyoanza kazi  nchini, lengo likiwa kuwezesha taifa kupata Katiba mpya bora itakayosimamia rasimali za nchi.

Mkurugenzi wa Habari na Uenezi, wa chama chama hicho John Mnyika alibainisha hayo katika taarifa yake kwa vyombo vya habari iliyolenga kuhamasisha wananchi kujitokeza kwa tume ya mabadiliko ya katiba mpya kutoa maoni.

“Hali ya nchi kwa sasa ni tete,inakabiliwa na tishio la migomo ya madaktari, walimu, chanzo ni kutokana na  mgao usio sawa na ni kutokana na  mamlaka makubwa ya kikatiba ya ugawaji na usimamizi wa fedha za umma kuwa mikononi mwa  Rais na Serikali badala ya Bunge ambacho ndicho chombo kikuu cha kuisimamia Serikali kwa niaba ya wananchi”alisema Mnyika na kuongeza;

“Tunaomba wanachama na wananchi kwa ujumla kujitokeza kwa wingi kutoa maoni ya mabadiliko  ya katiba na ieleweke  kwamba mchakato wa katiba mpya unahusu hatma ya nchi na maisha yao,” ilisitiza sehemu ya Taarifa hiyo.

Akizungumzia mchakato wa Katiba mpya, Mnyika aliwataka wananchi kujisikia huru kwenda kueleza maudhui ambayo wamekuwa wakiyasema mara kwa mara ya kutaka madaraka ya Rais kupunguzwa na pia kuweka misingi muhimu ya kudhibiti ufisadi na matumizi mabaya ya madaraka.

Chadema pia kilitoa wito kwa wananchi kuondokana na mtizamo wa kwamba  haiwezekani kutoa maoni ya katiba mpya bila  kuifahamu kwa kina katiba iliyopo, bali waelewe kwamba mchakato huu unahusu kuandika katiba mpya na jambo la msingi kwao ni mbele ya Tume ya Mabadiliko ya Katiba mpya na kutoa maoni kwa kueleza maudhui ya Tanzania wanayoitaka.

“Pamoja na kutoa maoni kuhusu maudhui ya masuala ya kuzingatiwa katika katiba mpya, Chadema  kinatoa wito kwa wanachama na wananchi wote kutoa pia maoni kuhusu mchakato wa katiba mpya ili kuiwezesha Tume kuishauri serikali kuendelea kuiboresha Sheria ya Mabadiliko ya Katiba ya Mwaka 2011” alisema na kuongeza “Ili ikidhi mahitaji ya kujenga kuaminiana na muafaka wa kitaifa kwa mawasiliano na mashauriano na wadau mbalimbali”.

Katika hatua nyingine chama hicho kimekosoa mfumo uliotumiwa na tume ya kukusanya maoni wa kutangaza ratiba ya  kukusanya maoni ya wananchi bila kuanza  na ile ya kutoa  elimu kwa umma kuhusu mchakato wa katiba, katiba, ukatiba na masuala ya katiba.

Alisema uamuzi  wa tume kutoa elimu wakati huo huo ikikusanya maoni unaweza kuathiri mchakato wa katiba na kusisitiza kuwa, pamoja na kutoa mwito kwa umma kwenda kutoa maoni kwa tume, chama hicho kitaendelea  na mpango wake wa kutoa elimu kwa wanachama na umma wote kwa ujumla, kuhusu mabadiliko ya katiba kwa kuzingatia sheria iliyopo

Chanzo:- Mwananchi