Mtikila aibukia sakata la Dk. Ulimboka

MWENYEKITI wa Chama cha DP, Mchungaji Christopher Mtikila amelaani kitendo cha kupigwa na kutekwa kwa Mwenyekiti wa Jumuiya ya Madaktari, Dk. Stephen Ulimboka na kujeruhiwa vibaya wiki iliyopita.
Kutokana na hali hiyo, amemuomba Rais Jakaya Kikwete kuviagiza vyombo vyake vya dola kufanya uchunguzi wa kina juu ya tukio hilo na kuwakamata watu wote waliohusika ili kuwafikisha kwenye mkondo wa sheria.

Alisema amepata taarifa nyeti za uhakika kutoka kwa watu wa usalama wa taifa kwamba kuna mkakati wa kuwafanyia unyama waandishi wa habari, wanasiasa watatu maarufu wa Chama cha Demokrasia na Maendeleo (CHADEMA),viongozi wa dini, walimu na wanafunzi wa vyuo vikuu, ambao wanaonekana ni kikwazo kwa Serikali na Chama Cha Mapinduzi (CCM) kushinda uchaguzi wa mwaka 2015.

Akizungumza na wandishi wa habari mjini Dar es Salaam jana, alisema kitendo alichofanyiwa Dk. Ulimboka hakiwezi kuvumiliwa kamwe.

Alisema katika tukio hilo, ni dhahiri inaonekana wazi Serikali imehusika na ilikusudia kumuua Dk. Ulimboka ili kupunguza kasi ya mgomo wa madaktari, lakini kudra za mwenyezi Mungu bado zinamlinda.

“Juzi Pinda katika suala hili la madaktari alisema liwalo liwe na kweli limekuwa , sasa kinachofanyika hivi sasa wanamfuta msaidizi wa Dk. Ulimboka, Dk. Deogratus Michael kumdhuru ili kupoteza ushahidi na nimeelezwa yupo mafichoni.

“Nashangaa kusikia polisi imeunda tume ya kuchunguza tukio hilo, nasema hapo hakuna uchunguzi bali wanajadiliana makosa waliyofanya na kushindwa kumuua Dk. Ulimboka ambaye hivi sasa ameendelea kuwaumbua kwa kuwataja majina na kuwataka kurudisha vitu vyake,”alisema.

“Mpango wa kutekwa, kufanyiwa unyama na hata kuua unawakusudiwa pia viongozi wa dini watakaodhubutu kuupinga utawala huu, walengwa wengine ni wanafunzi wa vyuo vikuu, wafanyabiashara wakubwa, walimu ambao wapo sasa katika maandalizi ya mgomo.