OSCAR PISTORIUS APATA DHAMANA

JOHANNESBURG, AFRIKA KUJSINI

OSCAR PISTORIUS amepata dhamana leo Ijumaa, na atakuwa nje hadi kesi yake ya kudaiwa kumuua kwa kumiminia risasi mpenzi wake, Reeva Steenkamp itakapoanza.

Mwanariadha huyo mlemavu aliyeshiriki michezo ya Paralimpiki aliinamisha kichwa chake na kuonesha ‘huzuni ya furaha’ wakati Hakimu Desmond Nair akitoa uamuzi wake katika mahakama ya Pretoria.

Pistorius aliwapungia watu wa familia yake ambao baadae walionekana wakisali baada ya hakimu Nair kutangaza uamuzi wake baada ya dakika 90 za kusoma maelezo mahakamani.

Pistorius, 26, ameshitakiwa kwa mauaji ya kukusudia dhidi ya mpenzi wake ambaye ni mwanamitindo, akidaiwa kuyatekeleza Februari 14, mwaka huu – asubuhi ya Siku ya Wapendanao.

Mwanariadha huyo anasema alimfyatulia risasi kwa bahati mbaya mpenzi wake kwa sababu alidhani ni mtu hatari aliyevamia nyumbani kwake.

Waendesha mashitaka wanasema alidhamiria kumuua mpenzi wake na kumshitaki kwa makosa ya mauaji ya kukusudia, wakisema ufyatuaji risasi ulikuka baada ya majibizano baina ya wawili hao.

Nair alimwachia kwa dhamana ya randi milioni 1 (dola 113,000 za Marekani), zikiwamo dola 11,300 taslimu na kuthibitisha kwamba zilizobaki zinapatikana.

Hakimu huyo alisema kuwa ni lazima Pistorius ambaye atarudi kortini kwa mara nyingine Juni 4, akabidhi pasipoti zake za kusafiria na pia bunduki ambazo anamiliki.

“Pistorius pia hawezi kutoka nje ya Pretoria bila ruhusa ya ofisa anayehusika na masuala ya dhamana,” alisema hakimu Nair.

Marehemu Reeva Steenkamp

Hakimu huyo pia alimuamuru kutorudi katika nyumba yake, ambako mauaji ya Steenkamp yalifanyika.

Masharti mengine ni pamoja na mtuhumiwa huyo kutotumia kilevi au mihadarati.

Uamuzi huo umekuja baada ya siku nne za mvutano kati ya waendesha mashitaka na upande wa utetezi katika usikilizaji wa maombi hayo ya dhamana.