Musoti azima simu,Simba SC wahaha

Beki wa timu ya Simba, Mkenya, Donald Musoti

KATIKA hali ya kushangaza, uongozi wa Simba mpaka sasa bado haujafahamu na hauna taarifa yoyote kuhusiana na beki wa timu hiyo, Mkenya, Donald Musoti atarejea lini nchini na ni kitu gani ambacho kimemkwamisha mpaka sasa  kushindwa kuwasili, wakiwa hawana mawasiliano naye huku beki Mganda, Joseph Owino akitarajia kutua nchini leo Jumatatu.
Musoti amezima simu na Simba inahaha jinsi ya kumpata huku ikiwa haijulikani atatua nchini lini.
Wachezaji wa nje wa Simba, mpaka sasa ni Mrundi, Amissi Tambwe pekee ndiye aliyewasili hapa nchini huku Donald Musoti na Joseph Owino pekee ndiyo ambao bado hawajaungana na timu hiyo.
Habari kutoka ndani ya klabu hiyo, zinasema kuwa mpaka sasa bado uongozi haujafahamu Musoti atarejea lini katika kikosi hicho huku wakimtumia kipa Ivo Mapunda kuhakikisha mchezaji huyo anakuja kuitumikia timu hiyo.
Taarifa zinasema kuwa, viongozi wa klabu wamejaribu kumtafuta kwa mawasilaino yake lakini imeshindikana, ndiyo maana wameamua kumtumia kipa huyo kwa kuwa waliwahi kuwa pamoja huko nchini Kenya.
“Musoti bado hatuelewi kitu gani ambacho kimemkwamisha mpaka ameshindwa  kurejea mapema, tena bila taarifa yoyote, ndiyo maana tumeamua kumtumia Ivo Mapunda kuhakikisha anafahamu mchezaji huyo alipo na lini atarejea nchini kuja kuungana na timu yake huku upande wa Owino anatarajia kutua siku ya leo Jumatatu,” alisema mtoa taarifa