Rais wa Zambia hajalazwa hospitali, ashindwa kuhutubia UNGA

Maafisa wa Polisi nchini Marekani wamesema rais wa Zambia, Michael Sata alitibiwa na daktari katika chumba cha hoteli alimofikia lakini hajalazwa hospitalini kama ilivyodaiwa.

Naibu Chifu wa Polisi wa New York, Kim Royster ameliambia shirika la habari la Associated Press kuwa rais Sata alitibiwa na madaktari wa Serikali ya Marekani siku ya Alhamisi kisha akapelekwa hospitalini lakini hakulazwa.

Rais Sata aliwasili nchini Marekani akitokea Lusaka, Zambia kwa ajili ya kuhudhuria Mkutano wa Viongozi wa Dunia kwenye Kikao cha 69 cha Baraza Kuu la Umoja wa Mataifa (UNGA - United Nations General Assembly) lakini hakuweza kuhutubia Baraza la viongozi hao wapatao 193 kutoka pande mbalimbali duniani siku ya Jumatano.

Sata mwenye umri wa miaka 77 ni rais wa tano wa Zambia aliyeingia madarakani mwaka 2011 baada ya kuwania kiti hicho kwa mara tatu. 

Mwezi Juni mwaka huu alienda nchini Israel kwa ajili ya matibabu na ameshatibiwa nchini Uingereza na Afrika Kusini mara kwa mara ikielezwa kuwa anasumbuliwa na 'kutapika' kila anachokula.

Hivi karibuni baadhi ya vyombo vya habari nchini humo viliripoti kuwa baadhi ya maafisa wa Serikali wanaulaumu upinzani kwa 'kumloga' rais Michael Sata.