Dk Shein alitangaza uamuzi huo jana kwenye kilele
cha maadhimisho ya miaka 51 ya Mapinduzi ya Zanzibar zilizofanyika
kwenye uwanja wa Amaan mjini Unguja na kuhudhuriwa na wageni mbalimbali
mashuhuri akiwamo Rais Jakaya Kikwete.
Viongozi wengine waliohudhuria sherehe hizo ni
Makamu wa Rais, Dk Mohamed Gharib Bilal, Makamu wa Kwanza wa Rais wa
Zanzibar, Maalim Seif Sharif Hamad, Makamu wa Pili Balozi Seif Ali Idd,
Spika wa Baraza la Wawakilishi, Pandu Ameir Kificho, Spika wa Bunge,
Anne Makinda, Jaji Mkuu, Othman Chande na Jaji Mkuu wa Zanzibar, Omar
Othman Makungu.
Pia walikuwapo marais wastaafu, Ali Hassan Mwinyi
na Benjamin Mkapa na Kiongozi wa upinzani Bungeni, Freeman Mbowe pamoja
na viongozi wengine wa vyama vya siasa Zanzibar.
Kufuta michango
Dk Shein alisema katika mwaka huu wa fedha,
Serikali ya Mapinduzi Zanzibar (SMZ) imefuta gharama zote katika elimu
ya msingi, sekondari pamoja na gharama za matibabu na upasuaji kwa wazee
na wajawazito.
“Serikali yangu itaendelea kudumisha misingi na
malengo ya Mapinduzi ya Zanzibar. Kuanzia mwaka huu wa fedha elimu ya
msingi na sekondari itakuwa haina malipo, wazazi na wazee nao
hawatachangia huduma zozote za matibabu na afya,” alisema Dk Shein.
Alisema tangazo la kutoa elimu bure lilitangazwa
na Rais wa kwanza wa Zanzibar, hayati Mzee Abeid Karume Septemba 23,
1964 na hivyo hiyo ni kuendeleza misingi hiyo iliyoachwa na ASP ya elimu
kwa wote hadi sekondari.
Uchaguzi Mkuu
Akizungumzia Uchaguzi Mkuu wa Oktoba na Kura ya
Maoni Aprili 30, mwaka huu, Dk Shein alisema lengo la SMZ na Serikali ya
Jamhuri ni kuona shughuli hizo zikifanyika katika mazingira ya amani na
utulivu na kuidhihirishia dunia kuwa Tanzania ni nchi ya kidemokrasia.
“Serikali zote mbili zitaendelea kutimiza wajibu
wake wa kulinda nchi na mipaka yake, zitahakikisha kuwa wakati wote
zinakabiliana na vitendo vya uvunjifu wa amani. Vikosi vyetu vya ulinzi
na usalama viko makini kusimamia jukumu hilo,” alisema Dk Shein.
Post a Comment