JK ahadharisha wanahabari

Dar es Salaam. Rais Jakaya Kikwete ametoa wito kwa waandishi wa habari kutoandika habari zenye kuchochea vurugu kwani kwa kufanya hivyo wanaweza kujikuta wakiwa matatani.

Kikwete alisema hayo juzi wakati akifunga kongamano la kutafuta amani lililoandaliwa na Kituo cha Demokrasia Tanzania (TCD).

“ Unaweza kuandika au kutangaza habari ya uchochezi leo, lakini vurugu zikitokea hata kama ni baada ya miaka 20 utatafutwa na kushtakiwa kwa habari hiyo,” alisema Kikwete.

Akitoa mfano, Kikwete alisema nchi za Rwanda na Kenya ni mifano hai kwa kuwa kuna waandishi wa habari ambao walishtakiwa pamoja na wanasiasa kwa uchochezi na kusababisha machafuko.

 “Nawakumbusha waandishi kuweni makini kwa habari mnazoziandika na kuzitangaza kwa kuwa mna uwezo wa kujenga na kubomoa,” alisema

Alisema vyombo vya habari,siasa  na dini vikitumiwa vibaya ni rahisi kusababisha vurugu zenye kuhatarisha maisha ya wananchi.

Alitaka TCD kuandaa kongamano kama hilo kwa ajili ya waandishi wa habari wakiwa ni wadau katika kutafuta amani.

Mwenyekiti wa TCD, James Mbatia akitoa maazimio ya kongamano hilo, alisema viongozi waandamizi wa serikali wajizuie kutumia lugha za vitisho.

Alisema pia kongamano hilo limeazimia kwamba kituo hicho kiwe karibu na vyombo vya habari na kuwahimiza kuandika habari zenye uzalendo na mshikamano wa kitaifa.

Mwananchi