Watu 480 wauawa kwenye machafuko ya Misri

Harakati ya Ikhwaanul Muslimiin ya Misri imetangaza kuwa, kwa akali watu 480 wameuawa, 8,000 kujeruhiwa na wengine 1,500 kutiwa mbaroni kwenye ghasia na machafuko yaliyodumu kwa wiki tatu nchini humo. Chama cha Uadilifu na Uhuru, tawi la kisiasa la Ikhwaanul Muslimiin, kimeeleza kuwa katika kipindi cha wiki tatu zilizopita, watu wasiopungua mia nne na themanini wameuawa na wengine elfu nane kujeruhiwa pamoja na kufungwa kanali tisa za televisheni za harakati hiyo. Taarifa zinasema kuwa, machafuko na mapigano nchini humo yamesababishwa na hatua ya jeshi ya kumuondoa madarakani na kumuweka kizuizini Rais Mohammad Morsi wa nchi hiyo. Wafuasi wa Morsi wamekuwa wakijitokeza barabarani kila siku kumuunga mkono kiongozi huyo na hivyo kukabiliwa na hatua kali za jeshi.

Waziri wa Lebanon: Hizbullah ni chama cha kisiasa

Waziri wa Mambo ya Ndani wa Lebanon amesema kuwa, chama cha Hizbullah ni harakati ya kisiasa inayotambuliwa rasmi nchini Lebanon. Marwan Sharbil amesisitiza kuwa, Hizbulah ni chama cha kisiasa na kina wabunge na mawaziri kwenye serikali ya Lebanon. Waziri wa Mambo ya Ndani wa Lebanon ameelezea kushtushwa kwake na maamuzi ya hivi karibuni ya Umoja wa Ulaya ya kulijumuisha tawi la kijeshi la Hizbulah kwenye orodha ya makundi ya kigaidi na kusisitiza kuwa, Hizbullah ni harakati ya muqawama na kwamba madai yanayotolewa dhidi ya harakati hiyo hayana ukweli wowote. Waziri wa Mambo ya Ndani wa Lebanon amesema kuwa, njama za nchi za Ulaya za kulijumuisha tawi la kijeshi la harakati hiyo kwenye orodha ya makundi ya kigaidi ni kutaka kudhoofisha mapambano yake ya muqawama dhidi ya utawala wa Kizayuni wa Israel.