Kamati ya Zitto kuanza kazi wiki ijayo

Dar es Salaam. Taasisi za Serikali na mashirika ya umma zitakuwa na wakati mgumu pale zitakapoanza kujitokeza mbele Kamati ya Bunge ya Hesabu za Serikali (PAC), kama zitakuwa zimefanya matumizi ya fedha za umma kinyume na utaratibu.

Kwa mujibu wa ratiba iliyotolewa na Mwenyekiti wa Kamati hiyo, Zitto Kabwe kutakuwa na mjadala wa taarifa za kifedha za taasisi za Serikali Kuu na mashirika ya umma kuanzia Jumatatu ijayo.

Moja ya mambo yatakayojadiliwa ni madeni ya Serikali kwa Mifuko ya Hifadhi za Jamii.

Imeelezwa kuwa kamati hiyo itajigawa katika makundi mawili, moja litashughulika na taasisi za Serikali Kuu wakati jingine likijikita katika mashirika ya umma.

“Kundi la kwanza linaloongozwa na Zitto litashughulikia Hesabu za Serikali Kuu na BoT na kundi la pili linaloongozwa na Makamu Mwenyekiti wa PAC, Deo Filikunjombe litashughulikia Hesabu za Mashirika ya Umma,” ilisomeka sehemu ya ratiba hiyo.