Mnyika ayataka majina waliochukua fedha Stanbic

Dar es Salaam. Mbunge wa Ubungo, John Mnyika (Chadema) ametaka watu wote waliopokea fedha zaidi ya Sh73 bilioni kutoka kwenye akaunti mbili za PAP katika Benki ya Stanbic iliyopokea fedha za escrow watajwe majina na kufilisiwa mali zao.

Akichangia taarifa ya Kamati ya Hesabu za Serikali (PAC) kuhusu sakata la fedha za escrow bungeni jana, alisema idadi ya watu na kiwango cha fedha kilichochotwa ni kikubwa kuliko kilichokuwa katika Benki ya Mkombozi.

Mnyika alisema anaunga mkono azimio namba tatu la Kamati ya Hesabu za Serikali (PAC), lililotaka watu wote waliogawiwa fedha kutoka kwenye akaunti ya Benki ya Mkombozi kuzirudisha mara moja na hata ikibidi kufilisiwa.

“Uchunguzi wa fedha za Stanbic usiishie tu kwa watu waliochukua fedha, badala yake miamala yao ifuatiliwe ili ibainike walikwenda kumlipa nani na wapi ili wachukuliwe hatua zinazostahili,” alisema Mnyika.

Pia mbunge huyo alisema kuwa wakati fedha hizo zikitolewa Benki Kuu ya Tanzania (BoT), Waziri wa Fedha alikuwa anaumwa na kwamba kumekuwapo na utata juu ya kifo cha waziri huyo.

“Wengine walihusisha kifo kile na masuala ya utoaji wa fedha za escrow,” alisema Mnyika kabla Spika wa Bunge Anne Makinda kusimama na kumtaka asimtaje waziri huyo.

“Naomba nikumbushe, mwenye mzazi wake aliwaombeni msimshirikishe baba yake katika maneno haya, naombeni sana mnaumiza familia za watu bila sababu,” alisema Makinda.

Hata hivyo, Mnyika alimpa pole mtoto huyo na kusema kuwa kwa kulitambua hilo, ndiyo maana hakumtaja mtu bali alikuwa akizungumzia cheo cha aliyekuwa waziri wa fedha wakati huo.

“Nazungumzia nafasi ya Waziri wa Fedha katika mchakato mzima, nani alikuwa anakaimu nafasi ile kipindi kile, nini kilitokea wakati ule Bunge linahitaji kuelezwa,” alisema Mnyika.

Vilevile alisema kwa kuwa Serikali inaona kigugumizi kumwajibisha Waziri Mkuu Mizengo Pinda kutokana na kushindwa kuisimamia Serikali, Bunge litamwajibisha kwa kuandaa saini za kutokuwa na imani naye.

Mdee

Mbunge wa Kawe, Halima Mdee (Chadema), alisema kauli ya Naibu Waziri wa Fedha, Mwigulu Nchemba kuwa kuna fedha za kodi ziliibiwa, ina maanisha kuwa hasara hiyo ni matokeo ya ushauri uliotolewa na Mwanasheria Mkuu wa Serikali, Jaji Frederick Werema.
- Mwananchi