STATE HOUSE ZANZIBAR
OFFICE OF THE PRESS SECRETARY
PRESS RELEASE
Zanzibar
TAARIFA KWA VYOMBO VYA HABARI
Rais
wa Zanzibar na Mwenyekiti wa Baraza la Mapinduzi Dk. Ali Mohamed Shein
amesisitiza tena umuhimu wa viongozi wa kisiasa kufuata sheria na
taratibu zilizowekwa katika kuendesha shughuli zao za kisiasa na kuwa
tofauti za vyama isiwe sababu ya viongozi hao kukiuka utaratibu na
sheria hizo.
Akizungumza
mara baada ya kupokea matembezi ya vijana wa Chama cha Mapinduzi
(UVCCM) katika viwanja vya Mnanzi Mmoja mjini Unguja jana ikiwa ni
sehemu ya shamrashamra za maadhimisho ya miaka 51 ya Mapinduzi Dk. Shein
alisema kuwa “tofauti za kisiasa na vyama zisitufanye tukakiuka
utaratibu wa kisheria uliowekwa”
Alibainisha
kuwa Zanzibar inaendeshwa kwa misingi ya kidemokrasia kwa kufuata
Katiba na sheria zilizopo huku kukiwa na vyombo vya kusimamia sheria na
utoaji haki kwa kila mwananchi.
Dk.
Shein ambaye pia ni Makamu Mwenyekiti wa CCM Zanzibar aliwakumbusha
wanasiasa kutumia mfumo uliopo wa vyama vya vingi kushindana kwa sera na
hoja na kuepuka maneno ya kuwatisha wananchi na kuwatia hofu.
Alibainisha
kuwa kumekuwepo na ushirikiano mzuri katika uendeshaji wa Serikali
iliyo chini ya mfumo wa Umoja wa Kitaifa hivyo kuhoji kulikoni baadhi ya
viongozi wakiwa nje ya serikali wanafanya mambo tofauti.
“Tumekuwa
tukishirikiana vyema katika serikali kulikoni huko? Kwa nini baadhi
wanasahau utamaduni wa uongozi, lugha za viongozi na wajibu wao katika
jamii”alihoji Dk. Shein.
Kwa
hivyo aliwaambia mamia ya vijana kuwa yeye binafsi hatishiki na maneno
yanayosemwa na baadhi ya watu wanaodai ‘nchi yao’ kwa kuwa anaendesha
nchi kwa mujibu wa Katiba na Sheria.
“Nchi
hii ni yetu sote na tunaiendesha kwa misingi ya utawala bora na katika
utendaji wangu natenda haki kwa mujibu wa Katiba na Sheria” Dk. Shein
alisema.
Dk.
Shein aliwaeleza mamia ya vijana na wananchi waliohudhuria hafla hiyo
kuwa anashangaa kama wanavyoshangaa wananchi wengine wa Zanzibar kauli
za baadhi ya watu visiwani hapa wanaodai kutaka ‘nchi yao’ huku akihoji
nchi hiyo walimkabidhi nani.
“watuambie
wamempa nani nchi yao kwa kuwa sisi Zanzibar mwanzoni tulikuwa
tukijitawala wenyewe tukavamiwa na Wareno na baadae wakaja Waomani huku
wakahamiwa na waingereza. Wazee wetu wakafanya mapinduzi kuirejesha nchi
mikononi mwa wenyewe baada ya njia za kawaida kushindikana”Dk. Shein
alieleza.
Aliwataka
watu hao kusubiri uchaguzi kwa kuwa ndio njia pekee iliyopo sasa kupata
madaraka nchini huku akiwatahadharisha kuwa Chama cha Mapinduzi kiko
imara kuhakikisha kuwa kinaendeleza historia yake ya kushinda uchaguzi
na kushika dola.
Aliwaambia
vijana kuwa Mapinduzi ya mwaka 1964 halikuwa tukio la kupita bali
mchakato uliotokana na madhila makubwa waliyokuwa wakifanyiwa wananchi
wazalendo wa Zanzibar na utawala wa sultani uliokuwa ukihamiwa na
Waingereza.
“Baada
ya Afro Shirazi kunyimwa ushindi katika kila chaguzi na uamuzi wa
Muingereza kuipa Zanzibar ‘uhuru’ chini ya Sultani wazee wetu hawakuwa
na namna bali kufanya mapinduzi kuirejesha nchi mikononi mwa wananchi”
Shein alisema.
Katika
hafla hiyo iliyohudhuriwa pia na Makamu wa Pili wa Rais wa Zanzibar
Balozi Seif Ali Iddi, Dk. Shein aliwakumbusha wananchi kitendo cha
kuhuzunisha cha utawala wa kikoloni cha kuwalazimisha wananchi wa
Zanzibar kwa vitisho kuhudhuria sherehe za kumkabidhi Sultani nchi yao.
“’Uhuru’
ule uliwasononesha sana wazee wetu na sisi (tukiwa watoto)
tulilazimishwa kuhudhuria sherehe huku tukitishiwa hata kufukuzwa skuli
kama hatukuhudhuria” alisema Dk. Shein na kuvuta hisia za vijana na
viongozi waliohudhuria halfa hiyo.
Aliongeza
kuwa lengo la mapinduzi ilikuwa ni kuleta usawa na haki kwa kila
mwananchi kinyume na utawala wa sultani ambao ulijengwa chini ya misingi
ya kibaguzi ya kila aina.
Kwa
hivyo waliwapongeza Umoja wa Vijana wa CCM kwa kuandaa matembezi hayo
ambayo yanapeleka ujumbe moja kwa moja kwa wapinga mapinduzi kuwa wenye
Mapinduzi wapo na wanayathamini na kuyalinda.
Mapema
Mwenyekiti wa UVCCM Sadifa Juma Khamis alisema matembezi hayo ya vijana
ni mchango wao wa kuimarisha na kuyaenzi Mapinduzi ya mwaka 1964 ambapo
vijana wenzao wa Afro Shirazi walijitwisha jukumu kubwa la kuwakomboa
wananchi wa Zanzibar dhidi ya uonevu na udhalimu wa wakoloni wa
kisultani.
“Umoja
wa vijana wa Afro Shirazi ulifanya wajibu wake wa kuleta Mapinduzi na
sisi tunafanya wajibu wetu wa kuyalinda, kuyatetea na kuyaenzi” alieleza
Mwenyekiti huyo.
Sadifa
alieleza kuwa UVCCM unashangazwa na baadhi ya watu ambao aliwaita
mabaki ya sultani kuendelea ‘kuidai’ Zanzibar tofauti na wakoloni
wengine ambao baada ya kuondolewa hawarudi tena kudai nchi ilizozitawala
hivyo kuwaonya watu hao kuwa kamwe hawawezi kurudi kuitawala Zanzibar.
Kwa
upande wake Naibu Katibu Mkuu wa UVCCM Zanzibar Shaka Hamdu Shaka
alisema vijana 600 kutoka Unguja, Pemba na Tanzania Bara walishiriki
matembezi hayo yaliyoanza tarehe 6 Januari huko katika kijiji cha Unguja
Ukuu katika Mkoa wa Kusini Unguja.
Alieleza
kuwa matembezi hayo yalipita katika wilaya zote saba za kichama katika
kisiwa cha Unguja na kuwapa nafasi vijana kujifunza na kutoa ujumbe wa
Mapinduzi kwa wananchi kuhusu historia, malengo na mafanikio
yaliyopatikana hadi sasa.
Katika
maelezo yake alizidi kueleza kuwa katika vituo vya mapumziko vijana
walijielimisha pia kuhusu Katiba iliyopendekezwa na kupata ufafanuazi wa
vipengele mbalimbali vya Katiba hiyo hatua ambayo imewaongezea ufahamu
zaidi ya Katiba hiyo.
Naibu
Katibu Mkuu huyo aliwaeleza vijana na wageni walioshiriki hafla hiyo
kuwa UVCCM imepanga kuifufua tena Jumuiya ya vijana Chipukizi wa CCM
(young pioneers) kwa kufanya uzinduzi rasmi tarehe 01 Machi mwaka huu.
Postal Address: 2422 Tel.+255 776 613 015, Fax: 024 2231822
إرسال تعليق