Akihutubia mkutano wa hadhara wa Umoja wa Vijana wa Chama cha Mapinduzi Zanzibar (UVCCM) , Naibu Katibu Mkuu Shaka Hamdu Shaka, alisema wakati umefika kwa serikali kuwasilisha muswada huo ili kuzuia matumizi mabaya ya mitandao ya kijamii.
Shaka alisema mageuzi ya teknolojia na ujio wa utandawazi kwa dunia ya tatu ikiwemo Zanzibar umezikuta wakati zikiwa hazijajitayarisha na ujio huo na kwa sababu hiyo hivi jamii inashuhudia ukiukwaji mkubwa wa maadili, mila na utamaduni wa kuheshimu utu, huku baadhi ya wamiliki na waendesha mitandao ya kijamii wakiwavunjia heshima wananchi.
“Baba wa Taifa marehemu Mwalimu Julius Nyerere aliwahi kusema uhuru bila ya utii ni ujinga na akasema pia uhuru usio na mipaka ni sawa na wendawazimu…kwa maana hiyo sithubutu kukandamiza uhuru wa maoni, ila ninachohimiza ni wajibu katika jamii inayoheshimu umoja, amani na upendo” Alisema Shaka.
Alisema kutungwa kwa sheria hiyo ambayo itahusisha matumizi ya tovuti, umiliki na uendeshaji kutasaidia kuepusha jamii kuingia katika mifarakano inayosababisha na matumizi mabaya ya mitandao ya kijamii.
Shaka alitoa mifano ya nchi kadhaa ambazo zimetumbukia katika mifarakano kwa sababu ya chokochoko zilizokuwa zikienezwa katika mitandao ya kijamii.
Akizungumzia hali ya kisiasa, alisema wapinzani na hasa Chama cha CUF wasitegemee kushinda uchaguzi mkuu wa mwaka huu kwani mbinu na ujanja wao wanaotumia hasa katika majimbo ya Pemba umebainika na CCM haitakubali tena mbinu chafu zisizo za kidemokrasia, alisisitiza Shaka.
إرسال تعليق