Usafiri wa reli unavyokosesha nchi mapato na maendeleo

Unahitaji kutanguliza maombi na dua kujihakikishia usalama unaposafiri kwa njia ya Reli ya Kati. Usafiri huo unadaiwa kuwa ni ‘nusu ya kifo’ kwa watumiaji wake.

Katika harakati za kudhibiti hali mbaya katika Kampuni ya Reli Tanzania (TRL), hivi karibuni, Waziri wa Uchukuzi, Dk Harrison Mwakyembe aliwatimua kazi watumishi sita kutokana na kitendo cha kuihujumu kampuni hiyo.

Alichukua uamuzi huo kwa lengo la kuimarisha upya TRL katika utoaji wa huduma zake kupitia maboresho yanayoendelea ikiwamo vifaa na mabehewa mapya.

Pamoja na hatua hiyo, wachambuzi wa masuala ya kiuchumi wanasema endapo usafiri wa njia ya reli utawekezwa ipasavyo, utakuwa nyenzo pekee inayorahisisha kasi ya ukuaji wa uchumi na maendeleo ya wananchi.

Akizungumzia umuhimu wa sekta hiyo, Profesa Hamphrey Moshi wa Chuo Kikuu cha Mzumbe, anataja mambo kadhaa muhimu ya kuimarishwa katika sekta hiyo ya reli kwa manufaa ya nchi.

Anafafanua kuwa reli ya kati itakapoboreshwa itasaidia kupunguza msongamano wa mizigo katika bandari ya Dar es Salaam ambayo inatumika kupitishia mizigo inayokwenda nchi jirani na mikoani.

“Wafanyabiashara wamekuwa wakilalamikia msongamano wa mizigo kwa sababu maroli hayana kasi ya kusafirisha mizigo hiyo, wanahamia katika bandari nyingine, lakini njia hiyo ya reli ingekuwa imara tungeongeza mapato ya bandari na kulinda wateja,” anasema.

Kwa mujibu wa TRL, kupitia mpango wake mpya wa biashara unaoonyesha licha ya vikwazo vilivyopo, abiria wake wameongezeka hadi kufikia milioni moja na zaidi mwaka uliopita.

Kutokana na hatua hiyo, Profesa Moshi anasema kuimarika kwa njia ya reli kutasaidia kupunguza mfumuko wa bei. Anasema mfumuko huo unaathiri maisha na uchumi wa Watanzania kutokana na ukosefu wa mahitaji ya kutosha kwa mikoani.

Anasema kila wakati Serikali inatumia gharama kubwa kujenga miundombinu ya barabara, lakini usafiri wa malori umekuwa ukiiharibu hatua inayoathiri mgawanyo wa bajeti.

“Uzoefu unaonyesha malori yanachangia ongezeko la ajali za barabani. Treni moja ni sawa na malori 75, ambayo yanaharibu mazingira ya hali ya hewa,” anasema na kuongeza:

“Lakini tukiimarisha njia ya reli, Serikali itaokoa fedha za matengenezo ya dharura kwa barabara, ajali zitapungua, makali ya maisha pia yatapungua.”
- Mwananchi