Kamanda Leonard Paulo.
Wimbi la uvamizi na uporaji wa silaha kwenye vituo
vya polisi limeendelea kushamiri safari hii likiamia mkoani Morogoro kwa
kituo kidogo cha Polisi Mngeta, kilichopo Wilaya ya Kilombero, kuvamiwa
na kuporwa bunduki moja aina ya SMG na magazine moja yenye risasi 30.
Tukio la Morogoro lilitokea juzi majira ya saa 9:30 usiku na Jeshi
la Polisi mkoani Morogoro linamtafuta kijana mmoja, Emmanuel Shewele
(21), kwa tuhuma za kusababisha kuvunjwa kwa kituo hicho.
Mbali ya silaha hizo, wavamizi hao waliiba vielelezo vya ushahidi
ili kupoteza ushahidi wa kesi zake kufuatia kushtakiwa mahakamani kwa
kesi zaidi ya tano.
Kamanda wa polisi mkoani hapa, Leonard Paulo, alitaja vielelezo
kuwa ni genereta moja, viti vinne vya plastiki, redio moja aina ya
sabufa, betri ya gari moja na spika moja ya redio.
Alisema tayari watuhumiwa watatu wamekamatwa ambao ni Ramadhani
Shewele (20), Hamisi Hamidi (45) na Egnas Shewele (34), huku wakiendelea
kumtafuta Emmanuel Shewele (21) wote wakiwa ni wakazi wa kijiji cha
Nakaguru A, wilayani humo.
Kamanda Paulo alisema polisi walifuatilia tukio hilo na kufanikiwa
kuvipata vitu hivyo vikiwa katika msitu wa Simbangingile umbali wa
kilometa sita kutoka kilipokuwa kituo hicho cha polisi.
Alisema kuna uhusiano wa vitu hivyo na mtuhumiwa anayetafutwa Shawele kutokana na kwamba vilivyoibwa ni vielelezo vyake.
Hili ni tukio la tatu katika kipindi kisichozidi mwezi mmoja kwa
vituo vya polisi kuvamiwa na kuporwa silaha baada ya uporaji kama huo
kutokea Ikwiriri na Tanga.
إرسال تعليق