Vyama ya siasa vyalalamikia kutogawiwa nakala za katiba.

Mwenyekiti wa Baraza la Vyama vya Siasa, Peter Kuga Mziray.

Wakati serikali ikiendelea kusisitiza kuwa kura ya maoni ya kukubali au kukataa katiba inayopendekezwa itafanyika mwezi ujao, vyama vya siasa vimelalamika kutopewa nakala ya katiba hiyo hadi sasa.

 

Mwenyekiti wa Baraza la Vyama vya Siasa, Peter Kuga Mziray, alisema vyama hivyo havijapewa nakala ya katiba inayopendekezwa licha ya serikali kuahidi kuitoa kwa wakati kwa wadau vikiwamo vyama hivyo.

 

“Nimekuwa nikipigiwa na baadhi ya vyama vya siasa vikilalamika kwamba  havijapewa katiba inayopendekezwa, nashangaa mamlaka zinazohusika hadi sasa kushindwa kutoa nakala hizo wakati muda wa kupiga kura ya maoni umekaribia,” alisema.

 

Mziray alisema serikali inapaswa kutambua kuwa vyama vya siasa ni wadau muhimu katika suala la katiba hivyo vilistahili kupewa nakala ya katiba hiyo ili vianze mchakato wa kuelimisha wananchi.

 

Alisema Baraza la Vyama vya Siasa linatarajia kukutana hivi karibuni kwa ajili ya mambo kadhaa nchini kama uandikishaji wapiga kura kwa kutumia teknolojia ya kisasa ya utambuzi wa alama za vidole (BVR) ambao umezua malalamiko mengi kutoka kwa wadau.

 

Lingine litakalojadiliwa ni kura ya maoni ya kukubali  au kukataa katiba inayopendekezwa ili vyama viweke msimamo mmoja ambao utaiweka nchi katika hali ya amani kabla na baada ya uchaguzi mkuu wa Oktoba, mwaka huu.

 

Msemaji wa Wizara ya Katiba na Sheria, Omega Ngole, akithibitisha kuwa vyama vya siasa havijapewa nakala ya katiba na kwamba kwa sasa mchakato wa kuvigawia umeanza.

 

Ngole alisema awamu ya kwanza katiba hiyo zilisambazwa kwa mikoa, wilayani hadi ngazi ya mitaa na hatua itakayofuata ni kwa vyama vya siasa, taasisi na makundi mbalimbali.

 

“Unavyoongea na mimi hivi sasa tunajadiliana namna ya kuweka utaratibu wa kugawa katiba kwa taasisi, vyama vya siasa na makundi mengine, kazi hiyo inatarajia kuanza hivi karibuni,” alisema.