Gharama Kituo cha Mabasi cha Kange kufanyiwa uchunguzi

Mkinga. Mkurugenzi Mkuu wa Taasisi ya Kuzuia na Kupambana na Rushwa (Takukuru), Dk Edward Hoseah amesema uchunguzi wa gharama zilizotumika kujenga kituo kipya cha mabasi cha Kange jijini Tanga, utakamilika kwa siku 14 kuanzia sasa.

Mradi wa kituo hicho pamoja na eneo la kuegesha malori ambao umeshakamilika na kuanza kutumiwa, unadaiwa kugharimu Sh10 bilioni ambazo ni mkopo wa Benki ya Dunia.

Hata hivyo, mbali na gharama za ujenzi huo zimezua malalamiko kutoka kwa wananchi wanaodai kuwa ubora wa kituo hicho haulingani na thamani halisi ya fedha.

Dk Hosea alisema wananchi wanahisi kwamba mchakato mzima wa ujenzi huo uligubikwa na rushwa iliyosababisha kujengwa chini ya kiwango.

Dk Hoseah ambaye alikuwa wilayani hapa kuzindua jengo la ghorofa moja la ofisi za Takukuru lililogharimu Sh 1.2 bilioni, alisema malalamiko hayo yapo mezani kwake na alishatuma maofisa wake kufanya uchunguzi.

Alisema ataweka bayana kila kilichotumika.

“Nipeni wiki mbili uchunguzi utakuwa umekamilika na nitampa maelekezo Kamanda wa Takukuru Mkoa wa Tanga, Aidan Ndomba naahidi kuchukua hatua za haraka kwa wale watakaobainika kufanya ubadhilifu katika ujenzi huu wa stendi ya Kange,” alisema Dk Hoseah. Mwishoni mwa mwezi uliopita katika Kikao cha Kamati ya Ushauri ya Mkoa wa Tanga, Mbunge wa Tanga, Omari Nundu alichachamaa akidai kwamba hata mtu asiyesoma anajua kabisa kwamba kituo hicho hakikujengwa kwa gharama hiyo.

Nundu alisema ni wazi kuwa fedha zilizotolewa katika ujenzi huo zitakuwa zimeliwa na wajanja.

“Haiwezekani kituo cha mabasi kiwe kimejengwa kwa Sh6.4 bilioni na maegesho la malori  Sh2.6 bilioni, lazima nipewe maelezo hapa, wananchi hawatawaeleweni,” alinukuliwa akisema Nundu katika kikao hicho.