Makala hayo yatakuwa yakiandikwa na mchambuzi wa masuala ya kisiasa na kijamii, Julius Mtatiro.
Kila mgombea atachambuliwa uwezo, udhaifu na
nafasi yake kupitishwa na chama hicho kikongwe kuwania urais na
uchambuzi huo utakuwa ukichapishwa kila siku katika gazeti hili
linalotolewa na Kampuni ya Mwananchi Communications Limited (MCL),
ambayo pia inachapisha magazeti ya The Citizen na Mwanaspoti.
Baada ya kumaliza wagombea wa CCM, mchambuzi wetu atageukia wagombea wa vyama vingine vya siasa.
Mtatiro, ambaye ana Shahada ya Sanaa katika Elimu
(lugha, siasa na utawala), shahada ya Uzamili ya Utawala na ambaye kwa
sasa ni mwanafunzi wa fani ya sheria (LLB), ataandika uchambuzi huo
kutokana na utafiti alioufanya kwa kutumia vigezo vinane, kwa maoni yake
binafsi.
“Mwaka huu kuna Kura ya Maoni na Uchaguzi Mkuu.
Jukumu letu ni kuwasaidia wananchi kuyaelewa mambo haya mawili muhimu
pamoja na kuwajua wagombea husika,” alisema mhariri mtendaji mkuu wa
magazeti ya kampuni ya Mwananchi, Bakari Machumu.
“Ndiyo maana tumeamua kumtumia mtaalamu wa masuala
ya sayansi ya siasa ili uchambuzi uwe huru na usiopendelea mtu yeyote.”
Mhariri mtendaji wa gazeti la Mwananchi, Frank Sanga alisema:
“Uchambuzi huo ni maoni binafsi ya Mtatiro. Sisi tutakachokifanya ni
kuyapitia ili kuhakikisha kuwa yapo katika mtiririko mzuri na
yanazingatia sera za uhariri za MCL.”
Sanga alisema maoni ya mchambuzi huyo si lazima
yafanane na ya watu wengine na kuongeza kuwa kama watajitokeza watu
wengine watakaotangaza nia au kutajwa, watachambuliwa.
Mpaka sasa makada wanne wa CCM wameshatangaza nia
ya kugombea, huku wengine 17 wakitajwa kuitaka nafasi hiyo. Katika
makala hizo makada wote 21 watachambuliwa.
Mchambuzi huyo kwa takribani miezi minne sasa
amekuwa akiandika makala za Kuelekea Jimboni zinazochapishwa kila siku
ya Jumatano, Jumamosi na Jumapili katika gazeti la Mwananchi. Makala
hizo zimekuwa zikieleza kwa kina nafasi za wabunge mbalimbali katika
majimbo yao, pamoja na kukubalika kwa vyama katika maeneo hayo. Makala
hizo zimesifiwa na watu wengi kutokana na kueleza ukweli wala hali
halisi bila ya upendeleo.
Makada watakaochambuliwa ni wale waliotangaza nia
ambao ni Waziri Mkuu Mizengo Pinda, Naibu, Waziri wa Mawasiliano,
Sayansi na Teknolojia, January Makamba, Waziri wa Maliasili na Utalii
Lazaro Nyalandu na mbunge wa Nzega, Dk Khamis Kigwangalla.
Wengine watakaochambuliwa ni wale wanaotajwa
kuitaka nafasi hiyo ambao ni, Naibu Waziri wa Fedha, Mwigulu Nchemba,
Waziri wa Katiba na Sheria, Dk Asha - Rose Migiro, Mbunge wa Sengerema,
William Ngeleja, Waziri wa Mambo ya Nje na Ushirikiano wa Kimataifa,
Bernard Membe, Waziri wa Uchukuzi, Samuel Sitta. Mawaziri wakuu wa
zamani, Frederick Sumaye na Edward Lowassa ni makada wengine
watakaochambuliwa. Wengine ni Anne Makinda, ambaye ni Spika wa Bunge la
Muungano, Dk Emmanuel Nchimbi (mbunge wa Songea Mjini, Dk Gharib Bilal
(Makamu wa Kwanza wa Rais), na Profesa Mark Mwandosya ambaye ni Waziri
wa Nchi, Ofisi ya Rais (Kazi Maalumu).
إرسال تعليق