Simba SC yaongeza beki, straika kikosini

Kocha mkuu wa Simba, Goran Kopunovic.

WAKATI Ligi Kuu Bara inaelekea ukingoni, Kamati ya Usajili ya Simba, tayari imeanza kufanya tathmini ya wachezaji inaowahitaji kuongeza nguvu kwa ajili ya msimu ujao.

Mwenyekiti wa Kamati ya Usajili ya Simba, Zacharia Hans Poppe, aliliambia Championi Jumamosi kuwa, “Siwezi kukuambia majina, lakini tutaongeza wachezaji katika nafasi tatu kwa ajili ya kujiimarisha zaidi.“Kwanza ni beki wa kati, tunalazimika kujiimarisha zaidi kutokana na tulivyoona utendaji katika nafasi hiyo.

“Hatujajua beki atatokea nje au ndani ya Tanzania, tayari tumeanza kutafuta taratibu. Pili tunahitaji kiungo ambaye atakuwa na uwezo wa kukaba na kuchezesha timu ili kusaidiana na kina (Said) Ndemla na (Abdi) Banda pale kati.
“Nafasi ya tatu ni mshambuliaji, ukiangalia inaonyesha wazi tunahitaji mtu mzuri wa kufunga,” alisema Hans Poppe.Alisisitiza watakaa na Kocha Goran Kopunovic na kusikia ana maoni au mapendekezo yapi.