Esther Matiko: Nitagombea ubunge Jimbo la Tarime

Esther Matiko ni Mbunge wa Viti Maalumu Mkoa wa Mara. Ni mmoja wa wanasiasa vijana anayebeba matumaini ya vijana wengi nchini.

Kwa kutambua mchango wake hasa kwa kushiriki kikamilifu katika mijadala mingi ya Bunge, makala hii leo inamulika historia ya maisha yake na kugusia baadhi ya mambo muhimu aliyokutana nayo katika maisha yake ya kisasa.

Swali: Nani aliyekushawishi kuingia katika siasa?

Jibu: Siasa ni fursa ya utumishi. Ni eneo mojawapo unalopata fursa ya kuitumikia jamii na Taifa kwa ujumla. Kuhusu ushawishi ulianzia ndani ya familia, kwani baba yangu pamoja ya kuwa mwajiriwa alipenda siasa na kushiriki kwa kiwango kikubwa.

Lakini pia nje ya familia kuna wanasiasa walionivutia akiwamo marehemu Chacha Wangwe na kunifanya nihisi kupitia siasa nitawatumikia na kuwasemea wanyonge na maskini pamoja na kutetea rasilimali za nchi yangu.

Swali: Je, ulijisikiaje siku ya kwanza ulipoingia bungeni ukiwa Mbunge? Nani aliyekuwa mwenyeji wako siku hiyo?

Jibu: Kwanza sikuamini hadi pale niliposimama mbele ya spika na kula kiapo cha ubunge. Kiukweli ile siku sitoisahau kwani niliona ile ndoto yangu ya siku nyingi ya kuwasemea wananchi wa Tarime na kuwa kiongozi wa kisiasa wa kitaifa imeanza kutimia.

Swali: Kwa kipindi chote ambacho umekuwa bungeni ni siku gani ambayo hutoisahau? Na kwa nini?

Jibu: Yapo matukio mengi ambayo sitoyasahau, lakini mojawapo ni mchakato wa kupata wawakilishi wa wabunge katika Mabaraza ya Vyuo Vikuu.

Niliomba nafasi ya kuliwakilisha Bunge kwenye Baraza la Chuo Kikuu cha Dar es salaam (UDSM) na nakumbuka hadi muda wa ukomo wa kurudisha fomu nilikuwa peke yangu niliyekuwa nimerudisha fomu, lakini cha kusikitisha ni kwamba siku ya kupigiwa kura nikaona jina la mbunge mmoja mwanamke wa CCM nalo likitajwa licha ya kwamba hakuwa ameomba nafasi hiyo, kutokana na hali hiyo niliamua kujitoa kwa sababu tayari niliona kuna mazingira yasiyokuwa ya haki.

Swali: Wewe ni Mbunge wa Viti Maalumu je, kipi umekifanya tangu ulipopata wadhifa huu?

Jibu: Nimefanya mambo mengi sana, nimesaidia makundi mbalimbali ya vijana, wanawake, wazee na watoto katika kuwajengea uwezo wa kiuchumi, michezo, msaada wa kisheria na mengineyo- Mwananchi