Jinamizi la Escrow lazidi kumbana Tibaijuka, Mgawo wake ujenge uwanja wa ndege Bukoba

  Mgawo wake ujenge uwanja wa ndege Bukoba

Profesa Anna Tibaijuka

Jinamizi la kuchotwa Shilingi bilioni 306 za  akaunti ya Tegeta Escrow, limeendelea kumwandama aliyekuwa  Waziri wa Ardhi, Nyumba na Maendeleo ya Makazi, Profesa  Anna Tibaijuka, akishauriwa kutumia ‘majisenti’ aliyopata kujenga uwanja wa ndege wa Bukoba unaosuasua.
Mbunge wa Viti Maalumu (Chadema), Rebecca Mngodo, alimtaka  Tibaijuka atumie  bilioni 1.6 alizopata katika mgawo wa Escrow  kusaidia awamu ya pili ya upanuzi wa uwanja wa ndege wa Bukoba  mkoani Kagera ambao umekwama.
Mngodo alisema hayo wakati akichangia mjadala kuhusu taarifa za kazi za Kamati ya Kudumu ya Bunge ya Miundombinu na ya Nishati na Madini.
"Tibaijuka angekuwapo hapa, zile bilioni 1.6 angesaidia kulipa," alishauri Mngodo.
Profesa  Tibaijuka alikaririwa akithibitisha kupata mgawo wa fedha hizo kutoka kwa mmiliki wa kampuni ya VIP Engineering & Marketing, James Rugemalira, kumsaidia kuendeleza shule ya Babro Johansson  iliyoko Kwembe Dar es Salaam.
Kutokana na kitendo hicho, Rais Jakaya Kikwete, alimfukuza kazi Tibaijuka kutokana na kukiuka maadili ya uongozi yasiyoruhusu kupokea zawadi kwa kificho.