Mahakama Kuu nchini India yakataa kuondoa kesi ya Ubakaji inayowakabili watuhumiwa watano katika Jiji la New Delhi

Watuhumiwa wa Ubakaji nchini India wakiwa kwenye gari wakiingia katika mahakama inayosikiliza kesi yao. Picha Reuters/Stringer

Na Hisia za Mwananchi blog

Mahakama Kuu nchini India imetupilia mbali ombi lililowasiliswa na upande wa utetezi la kutaka kuhamisha kesi inayowakabiliwa watuhumiwa watano wa mauaji, utekajinyara na ubakaji wa mwanafunzi wa Chuo Kikuu cha Udaktari kutoka Jiji la New Delhi.

Jopo la majaji watatu ambao walikuwa wanasikiliza shauri la kutaka kuhamishwa kwa kesi hiyo wameamua kulitupilia mbali kutokana na kutoridhishwa na hoja ambazo zimekuwa zikitolewa na wanasheria wa watuhumiwa hao.

Mahakama Kuu nchini india imekataa ombi hilo baada ya kutoridhishwa na hoja ambazo zimewakilishwa na upande wa utetezi kitu ambacho kinafanya kesi hiyo iendelee kusikilizwa katika Jiji la New Delhi.

Mwanasheria wa mmoja wa mtuhumiwa wa kesi hiyo Manohar Lal Sharma ndiye aliwakilisha ombi la kutaka kubadilishwa kwa Mji ambao utumike kusikiliza kesi hiyo akihofia kutopata haki.

Mwanasheria Sharma aliamua kuwasilisha ombi hilo kutokana na kuona shinikizo kumbwa ambalo limekuwa likitolewa katika usikilizaji wa kesi hiyo kitu ambacho kilimsukuma kuona haki haitopatikana kwa mteja wake.

Kesi hiyo ambayo imehamishiwa katika Mahakama inayosikiliza kesi kwa haraka katika Jiji la New Delhi inatarajiwa kuendelea kusikilizwa baada ya shauri hilo kutupwa na Mahakama Kuu.

Kesi hiyo imekuwa ikifuatiliwa kwa karibu na wanaharakati pamoja na wananchi wa taifa hilo ambao wamekuwa wakitaka wabakaji hao kama wakikutwa na hatia basi inabidi wahukumiwe adhabu ya kifo.