Mkurugenzi Mtendaji wa kampuni ya K&M Archplans (T) Ltd, Profesa Arch Livin Mosham akifafanua jambo juu ya jengo hilo la kisasa linalotarajiwa kujengwa na TPHA (Linaloonekana kushoto kwake pichani), kwa wajumebe wa mkutano huo (Hawapo pichani) juzi, katika kongamano la 31 la kisayansi na mkutano mkuu wa mwaka, unaoendelea, katika ukumbi wa Stella Maris, Mjini Bagamoyo, Pwani.

CHAMA Cha Afya ya Jamii Tanzania (Tanzania Public Health Association-TPHA), kinajenga jengo la kitega uchumi la kisasa la ghorofa 20, katika makao makuu ya chama hicho jijini Dar es Salaam kama sehemu ya kujiongezea wigo wa mapato.

Hayo yalibainishwa kwenye kongamano la 31 la Kisayansi na Mkutano mkuu wa mwaka wa TPHA unaoendelea katika ukumbi wa Stella Maris, mjini Bagamoyo.

Tayari wataalamu wa majengo  nchini wa kampuni ya K&M Archplans (T)Ltd, wamewasilisha mpango kazi wao huo ikiwemo mchoro wa jengo hilo la TPHA litakavyokuwa.

Wataalamu hao wa K&M Archplans, kupitia kwa Mkurugenzi Mtendaji wa kampuni hiyo,  Profesa Arch Livin Mosha alisema kampuni yao imebobea katika ukandarasi wa majengo mbalimbali ikiwemo kuwa na uzoefu wa kutosha katika usanifu na mpanilio wa majengo.

Jengo hilo linatarajiwa kujengwa makao makuu ya TPHA, yaliyopo Kinondoni, mkabara  na barabara ya Ally Hassan Mwinyi (Barabara ya zamani ya Bagamoyo),  Victoria Makumbusho, jijini Dar es Salaam.

Naye Mwenyekiti wa TPHA Taifa, Dk.Elihuruma Nangawe  alieleza kuwa, Chama hicho kitaendela na mchakato wake ikiwemo kujadiliana kwa kina na wanachama katika kufikia malengo ya utekelezaji wake ambapo alibainisha kuwa lengo la TPHA,  ni kujenga jengo la gorofa 10 ama la gorofa 25.

Naye Katibu Mtendaji wa TPHA Taifa, Dk. Oberlin Kisanga alisema kongamano hilo  ni la  kuwakutanisha wataalamu ili kubadilishana ujuzi, uzoefu na kutoa mapendekezo namna ya kuleta mabadiliko katika jamii hususani sekta ya afya hapa nchini.

"Mpaka leo mada mbalimbali za kitaalamu zimewasilishwa na wataalamu hao zikiwemo masula ya afya ya msingi, jamii, Pia utafiti  na mipngo juu ya magonjwa ya ukimwi, kisukari, maendeleo ya afya mijini na vijijini na namna ya kuendeleza sekta ya afya hasa kwa sekta binafsi na serikali" alisema Dk.Kisanga.

Kongamano hilo la kisayansi lililoanza Jumatatu ya Novemba 24, wiki hii, linatarajia kumalizika kesho. 

Source:Andrew Chale