Wanaotaka kuvunjwa kwa SUK Zanzibar, wachukue hadhari kabla ya hatari

Ni miaka minne sasa tangu kuundwa kwa Serikali ya Umoja wa Kitaifa visiwani Zanzibar (SUK), ambayo kwa kiasi kikubwa imerejesha siasa za kistaarabu, ushindani wa sera za vyama, amani na utulivu.

Salma Said, Mwananchii

Zanzibar. Licha ya kuwapo kwa maelewano yaliyotokana na kuundwa kwa Serikali ya Umoja wa Kitaifa (SUK), kumekuwa na mawazo tofauti kwa baadhi ya wanasiasa visiwani Zanzibar wakitaka kurejea hali ya mwanzo na kuachana na muundo wa Serikali hiyo iliyovishirikisha vyama viwili vikuu visiwani humo vya CCM na CUF.

Baadhi ya wanasiasa wanaukosoa mfumo wa SUK kuwa hauna tija kwa siasa za Zanzibar, wengine wakiuelezea mfumo huo kuwa umeiweka Zanzibar katika siasa za kileo za ushindani wa hoja.

Miongoni mwao wanataka kurejea hali iliyokuwa mwanzo ya siasa za ushindani wa nguvu na zisizo na maelewano.

Makamu Mwenyekiti wa Umoja wa Wanawake Tanzania wa Chama cha Mapinduzi na Mwakilishi wa viti maalum, Asha Bakar Makame, mara kadhaa ametamka hadharani nia yake na ya baadhi ya wawakilishi wenzake kutaka kuwasilisha hoja binafsi ili kuondokana na mfumo huo.

Mjumbe wa Kamati Kuu ya CCM na Mwakilishi wa Jimbo la Magomeni, Salmin Awadh Salmin, naye anaipinga wazi wazi SUK na kutamka dhamira yao ya kuwasilisha hoja binafsi kutaka Zanzibar irejee katika mfumo wa anayeshinda kuchukua kila kitu.

Wiki iliyopita, Makamu Mwenyekiti wa CCM Zanzibar na Rais wa Zanzibar na Mwenyekiti wa Baraza la Mapinduzi, Dk Ali Mohammed Shein akizungumza na mabalozi wa nyumba kumi wa chama chake, pamoja na mambo mengine aliwaeleza ikiwa hawautaki mfumo wa SUK ni lazima CCM ishinde kwa kura nyingi zaidi, pia suala la mfumo huo limo ndani ya Katiba Zanzibar.

Historia ya siasa za Zanzibar

Historia ya siasa Zanzibar inaonyesha kuwa tangu kufanyika kwa uchaguzi wa kwanza mwaka 1957 hadi mwaka 2010 hakuna chama cha siasa kilichoweza kupata kura nyingi zaidi na kwamba matokeo ya chaguzi hizo ni kura kukaribiana.