Bei ya mafuta kuathiri utafutaji wa gesi Tz

Bagamoyo. Anguko la bei ya mafuta ghafi katika soko la dunia huenda likaifanya Serikali kupitia upya baadhi ya mikataba ya utafutaji wa mafuta na gesi ili kuwavutia wawekezaji wengi zaidi.

Akiwasilisha mada katika warsha ya siku mbili iliyoandaliwa na Shirika la Maendeleo ya Petroli Tanzania (TPDC) mjini hapa jana, kaimu mkurugenzi wa mikakati wa shirika hilo, Dk Wellington Hudson alisema hali hiyo inawatia wasiwasi na ikiendelea, shughuli za utafutaji mafuta na gesi zitaathirika.

Alisema upitiaji wa mikataba mara nyingi hufanywa kutokana na mabadiliko ya sheria, kuimarisha vipengele vya makubaliano, kuongezeka kwa ugunduzi katika vitalu na mwenendo wa soko la mafuta ghafi linalozidi kuyumba.

“Mwaka 2013 tulifanya mapitio ya mkataba wa kugawana mapato (MPSA) baada ya kugunduliwa kwa maeneo mengi katika ukanda wa Afrika Mashariki yenye kina kirefu, ikiwamo Tanzania mwaka 2010 na nchi jirani za Msumbiji, Uganda na Kenya,” alisema Dk Hudson.

Alisema wakati wakifanya mapitio ya mikataba hiyo mwaka 2013, wastani wa bei ya mafuta ghafi katika soko la dunia ilikuwa ni Dola 100 za Marekani (Sh165,000) kwa pipa wakati hivi sasa imeshuka hadi wastani wa Dola 61 (Sh100,650) kwa pipa.

Akizungumzia kushuka kwa bei hiyo kutakavyoathiri sekta ya gesi nchini, kaimu meneja wa utafutaji mafuta na gesi, Kelvin Komba alisema kampuni nyingi zinazotafuta mafuta na gesi nchini hutegemea mapato kutoka kwenye faida ya mafuta wanayopata katika nchi nyingine.

“Ikitokea bei ya mafuta imeshuka sana, itawafanya kupunguza gharama za uwekezaji katika utafutaji mafuta na gesi,” alisema.

Kaimu mkurugenzi wa uzalishaji, Dk Meshacky Kagya alisema kuna kila dalili ya matumaini mapya kwa Tanzania kugundua mafuta katika Ziwa Tanganyika siku zijazo.

kutokana na ukanda huo kuonyesha matokeo chanya ya nishati hiyo adhimu ulimwenguni.

alisema matumaini hayo yanatokana na nchi jirani ya Uganda kugundua mafuta katika Ziwa Albert lenye jiolojia inayofanana na ya Ziwa Tanganyika.

“Utafutaji mafuta katika Ziwa Tanganyika umekuwa na changamoto nyingi kutokana na kuwa na kina kirefu kama cha bahari cha wastani wa kuanzia mita 500 hadi 2,500. Na eneo lile lina kina takriban mita 1,500 hivyo meli kubwa zaidi zinahitajika kufanya shughuli hizo,” alisema Kagya.

Mpaka sasa kuna kampuni zinazoendelea kufanya uchunguzi na kuna matumaini watakuja na matokeo mazuri licha ya kazi hiyo kuhitaji mtaji mkubwa.