Mahakama Yatangaza Mgomo wa TAZARA ni Batili - Wafanyakazi waamuriwa kurudi kazini

MAHAKAMA Kuu, Divisheni ya Kazi imewataka wafanyakazi wa Mamlaka ya Reli ya Tanzania na Zambia (TAZARA) kurudi kazini, huku ikiagiza mamlaka hiyo kutowakata fedha wafanyakazi hao katika kipindi chote cha mgomo.

 

Licha ya Mahakama hiyo kutoa huku ya kuwataka kurudi kazini, wafanyakazi hao wamesema hawatarudi kazini mpaka watakapolipwa mishahara yao yote pamoja na kuonana na Waziri wa Uchukuzi Dk Harisson Mwakyembe ili kujadiliana naye kuhusu hatma ya Tazara pamoja na maisha ya wafanyakazi wake, kwa madai kuwa wamechoshwa na kufedheheshwa.

 

Hukumu hiyo ya kesi namba mbili ya mwaka huu ilitolewa juzi usiku na Jaji wa Mahakama hiyo, Iman Aboud, baada ya wafanyakazi hao kusota siku nzima kusubiri hukumu hiyo.

 

Jaji Aboud alisema kwa mujibu wa kifungu namba 94 (1) (f) cha sheria ya Ajira na Mahusiano Kazini mgomo huo ni batili, hivyo kutoa amri kwa wafanyakazi hao kurudi kazini.

 

“Mahakama imezuia moja kwa moja kwa wafanyakazi kufanya migomo iliyo kinyume cha sheria,” alisema Jaji Aboud.

 

Aidha, Mahakama imemtaka mwajiri kutokata fedha yoyote katika kipindi chote cha mgomo wa wafanyakazi hao kutokana na kitendo cha kukaa miezi mitano bila kuwa na mshahara kimetosha.

 

Kesi hiyo ilifunguliwa na Menejimenti ya Tazara kuiomba Mahakama hiyo kutoa amri kuwa mgomo huo ulioungwa mkono na Katibu Mkuu wa Trawu, kuwa ni batili na pia kuzuia moja kwa moja migomo inayofanywa na wafanyakazi hao kinyume cha sheria.

 

Tamko la wafanyakazi hao la kutorudi kazini, lilitolewa na Kaimu Mwenyekiti wa Chama cha Wafanyakazi wa Reli nchini (Trawu) Kanda ya Dar es Salaam, Yassin Mleke ambapo alisema, uamuzi huo ni wafanyakazi wote kuanzia Dar hadi Tunduma, mkoani Mbeya.

 

Kwa mujibu wa Katibu Mkuu wa Trawu, Erasto Kihwele chama hicho kinasikitika kuona watu ambao ‘wamekufa’ wanatakiwa kurudi kufanya kazi.

 

“Mwajiri alimshitaki Katibu Mkuu kwa kuhamasisha mgomo ambao haujafuata sheria na tunaamriwa watu ambao tayari tumekufa kurudi kazini. “Mheshimiwa Jaji kwa mamlaka aliyopewa ametuamuru turudi kazini kuanzia leo Januari 16, mwaka 2015 (jana) kwa sababu mgomo wetu sio halali,” alisema Kihwele.

 

Awali akizungumza na wafanyakazi hao waliokusanyika kusikiliza kilichojiri, Naibu Katibu Mkuu wa Shirikisho la Vyama vya Wafanyakazi (TUCTA) Hezron Kaaya alisema, kuwa wafanyakazi hao wamekuwa wavumilivu lakini wanaonekana kuvunja sheria kwa kudai haki yao.

 

Hata hivyo alitaka wafanyakazi hao kutotishika kwa kuwa shirikisho hilo limeshachukua jambo hilo, huku akieleza kuwa siku saba walizotoa awali zimeisha wametoa siku tano nyingine ambapo baada ya siku hizo watatoa tamko la kutikisa nchi.

 

Mwenyekiti wa Trawu Taifa, Mussa Kalala alisema, mpaka sasa barua iliyopelekwa kwa Waziri kwa ajili ya kumuomba aje kukutana na wafanyakazi hao haijapata majibu, pia kusisitiza chama hicho hakina kauli binafsi bali kina kauli ya wafanyakazi.

 

Jana abiria wengine waliokuwa wasafiri kwa treni hiyo kwenda Bara walishindwa kusafiri na kuishia kurudishiwa nauli zao.

 

Wakati huo huo Shirikisho la Vyama vya Wafanyakazi nchini (TUCTA), limelaani kitendo cha wafanyakazi wa Mamlaka ya Reli ya Tanzania na Zambia (TAZARA) kutolipwa mishahara yao kwa muda wa miezi sita na kutoa siku tano kwa menejimenti ya mamlaka hiyo kuhakikisha inawalipa wafanyakazi hao mishahara yao.

 

Akizungumza na waandishi wa habari jana jijini Dar es Salaam, Naibu Katibu Mkuu wa TUCTA, Hezron Kaaya alisema kutokana na wafanyakazi hao kutolipwa mishahara yao walishindwa kwenda kazini kwa sababu hawakuwa na nauli lakini kitendo hicho kikatafsiriwa kuwa ni mgomo.

 

Alisema tatizo hilo la mishahara katika mamlaka hiyo limedumu kwa miaka kumi sasa hivyo linatakiwa kufikia mwisho na kuwataka wafanyakazi wote waungane katika hilo.