Kisiga atua mazoezini, afanya kikao na kocha

KIUNGO wa Simba ambaye alijiondoa kwenye kikosi hicho kwa madai ya kutoridhishwa na baadhi ya mambo ya ndani ya klabu hiyo, Shabani Kisiga jana jioni alitinga kwenye mazoezi ya timu hiyo yaliyofanyika kwenye Uwanja wa Dege Beach, Mbweni jijini Dar.

Championi lilimshuhudia Kisiga aliyekuwa amevalia mavazi ya kiraia akitinga mazoezini hapo na baadaye akazungumza na kocha wa kikosi hicho, Goran Kopunovic kwa zaidi ya dakika tano kabla ya kumuacha nje ya uwanja na kwenda kuendelea na program ya kuwanoa vijana wake.

Hata hivyo baada ya mazoezi kumalizika kocha huyo alirejea na kuungana na kocha msaidizi, Selemani Matola na kiongozi wa Simba, Salim Swaka ambapo walionekana wakizungumza na kiungo huyo lakini inaonekana hawakufikia muafaka kwani baada ya kumaliza viongozi hao waliondoka pamoja tofauti na Kisiga ambaye alitimka kivyake.

Championi lilijaribu kuwahoji wahusika hao kwa nyakati tofauti mazoezini hapo kuhusiana na kile walichokuwa wakikizungumza na Kisiga ambapo wote waligoma kuliongelea suala walilokuwa wakilijadili.