Tanesco yasisitiza hakuna mgawo wa umeme.

Mkurugenzi Mtendaji wa Shirika la Umeme nchini (Tanesco), Felchesmi Mramba.

Mkurugenzi Mtendaji wa Shirika la Umeme nchini (Tanesco), Felchesmi Mramba, amewahakikishia Watanzania kuwa hakuna mgawo wa umeme.

 

Wakati Mramba akitangaza hakuna mgawo huo,  baadhi ya maeneo yamekuwa yakilalamika kukatiwa nishati hiyo bila taarifa yoyote ya Tanesco.

 

Akizungumza na waandishi wa habari jana jijini Dar es Salaam, Mramba alisema Tanesco haijatangaza mgawo wa umeme na kwamba taarifa iliyotolewa kwenye vyombo vya habari ni kuwapo kwa matengenezo ya kisima cha Songas ambayo hufanyika kila mwaka.

 

Alisema mitambo hiyo imeanza kufanyiwa matengenezo tangu Machi 6, mwaka huu na Shirika lilihakikisha hakutakuwa na athari yoyote kwa wananchi.

 

Hata hivyo, alisema Tanesco ina vyanzo vya umeme vya kujitosheleza katika kuhakikisha nishati hiyo inapatikana kwa wateja wake.  Mramba alisema hali ya umeme kwa hivi karibuni imeathiriwa na mvua zilizonyesha kwa mfululizo na kusababisha madhara katika nguzo za umeme.

 

Alisema miundombinu ya umeme imeathirika zaidi kwa jijini la Dar es Salaam kutokana na kuwa  chakavu kwa kuwa imejengwa tangu miaka ya1980 bila kubadilishwa.

 

Aliongeza kuwa changamoto hiyo imewaletea madhara ingawa hakusema hasara iliyopatikana na kueleza kuwa bado hawajaijumlisha. “Hakuna mgawo wa chini chini wala wa juu juu tulihakikisha katika matengenezo ya kisima hicho cha Songas hapatatokea athari yoyote,” alisema.

 

Aidha, alisema kuna mitambo mipya ya umeme ambayo inaendelea kujengwa na kwamba mwishoni mwa mwaka huu kutakuwa na nishati nyingi kutokana na kukamilika kwa vituo hivyo pamoja na miundombinu