Bunge lataka Ewura ipunguze bei ya mafuta

Dodoma. Kamati ya Nishati na Madini, imeiagiza Mamlaka ya Udhibiti wa Nishati na Maji (Ewura) kufanya ukokotoaji upya wa bei ya mafuta ili kupunguza bei itakayompa ahueni mwananchi.

Hayo yalisemwa jana na Juma Njwayo alipokuwa akisoma taarifa ya kamati hiyo ya utekelezaji wa shughuli zake kwa kipindi cha Januari mwaka 2014 hadi Januari 2015.

Alisema kwa kufanya ukokotoaji upya bei ya mafuta katika Jiji la Dar es Salaam inaweza kufika Sh1,600 kwa lita.

“Ewura kupitia utaratibu wake wa M-One wauangalie upya kwani unaumiza mlaji, kutokana na kushuka kwa bei ya mafuta duniani bei inaweza kushuka kwa mwezi,” alisema.

Njwayo alisema bei ya bidhaa ya mafuta duniani imeshuka kwa asilimia 60 na kwamba Dar es Salaam imekuwa ikitumia asilimia 60 ya mafuta yanayoagizwa hapa nchini.

Alisema kampuni zinauza mafuta lita moja Sh1,520, lakini katika vituo vya kuuza rejareja Dar es Salaam bidhaa hiyo inauzwa kwa Sh1,955 kwa lita moja

Vilevile, kamati hiyo inaishauri Serikali kwa kushirikiana na wawekezaji binafsi ianze ujenzi wa bomba la mafuta kutoka Dar es Salaam kwenda mikoani ili kupunguza gharama za mafuta, usalama wa usafirishaji pamoja na usalama wa barabara za nchini.

Kamati hiyo pia imeishauri Serikali kujenga uzio kuzunguka machimbo ya Tanzanite yaliyoko Mererani.

“Pamoja na hilo tunaishauri kuhakikisha inaachana na mitambo ya kukodi ya kampuni za Songas-Gas, IPTL na Symbion kama ilivyofanya kwa Aggreko na kununua mitambo yake ili kuiondolea (Shirika la Umeme) Tanesco gharama kubwa ya kulipa gharama za umeme. Gharama zake ni kubwa mno.”

Kamati yataka sheria ya fidia ibadilishwe

Wakati huohuo, Kamati ya Kudumu ya Bunge ya Miundombinu, imeitaka Serikali kutazama upya Sheria ya Fidia kwa sababu utaratibu unaotumika kukokotoa fidia haukidhi viwango vya sasa.

Mwenyekiti wa kamati hiyo, Peter Serukamba alisema hayo bungeni jana wakati akisoma taarifa ya kazi ya kamati hiyo kuanzia Januari 2014 hadi Januari mwaka 2015.