Waganga wa jadi Moshi waonyana

Kilimanjaro. Waganga wa jadi wanaotumia viungo vya watu wenye ulemavu wa ngozi (albino) ikiwa ni sehemu ya tiba, wametakiwa kutofanya hivyo kwa kuwa huo ni ukatili dhidi ya binadamu.

Mwenyekiti wa Chama cha Waganga na Wakunga wa Tiba Asili Kilimanjaro (Chawatiata), Hasani Kabelo alisema hayo kwenye mkutano wa mwaka wa chama hicho.

Kabelo alisema wanasiasa na wananchi wanatakiwa kuwafikisha kwenye vyombo vya kisheria wanaojihusisha na matukio ya kikatili kwa albino.

Kabelo alisema ili kukomesha unyanyasaji dhidi ya albino, ni lazima jamii ielimishwe kurejea katika imani za dini zinazosisitiza kuthaminiana bila kujali hali na tofauti za kimaumbile.

Alisema katika kipindi hiki cha kuelekea Uchaguzi Mkuu, albino wanawindwa, hivyo ni jukumu la kila mmoja makini ili kuepuka mauaji dhidi yao.

Katibu wa chama hicho, Fadhila Mohamed aliwataka waganga na wakunga wa tiba asili kujisajili kwenye chama hicho kinachotambulika.

Alisema kuna baadhi ya waganga wapo kwa masilahi yao binafsi kwa kupiga ramli na kuwadanganya watu.

Alisema hao ndiyo wanaosababisha waganga waonekane wabaya mbele ya jamii Pia, alisema kuwa kuna waganga wanaotoka mikoa ya jirani wanafikia nyumba za wageni na kufanya kazi za uganga kinyemela kisha wanaondoka.

Aliishauri Serikali kuwakamata waganga hao kwa kuwa wengi wao ni matapeli.

Jumla ya waganga na wakunga wapatao 50 walihudhuria mkutano huo.