Wabunge waweka kambi majimboni

Mikoani. Baada ya kumalizika mkutano wa 18 wa Bunge Jumamosi iliyopita, wabunge wengi wamekimbilia kwenye majimbo yao hatua inayohusishwa na homa ya Uchaguzi Mkuu wa Oktoba.

Tofauti na kawaida ya wabunge wengi ambao baada ya vikao vya Bunge hukimbilia Dar es Salaam, safari hii wengi wameelekea majimboni kuweka mikakati ya kuhakikisha wanarudi bungeni katika uchaguzi huo.

Hivi karibuni gazeti hili liliandika habari kwamba wakati mkutano wa Bunge ukiendelea, wabunge wengi walikuwa Dodoma kimwili lakini kiakili walikuwa majimboni.

Baadhi ya wabunge waliohojiwa jana wameelezwa kuwa wako katika mikakati mbalimbali ya kupambana na wapinzani wao watakaojitokeza kuwania nafasi hiyo.

Mkoani Tanga kwa mfano, wabunge karibu wote tayari wapo katika majimbo yao.

Mbunge wa Korogwe Vijijini (CCM), Stephen Ngonyani jana alikuwa kwenye mazishi ya rafiki yake na taarifa zinasema kwamba baada ya mazishi hayo ataendelea na shughuli zake za jimbo.

Mbunge wa Tanga Mjini (CCM), Omar Nundu, Mbunge wa Lushoto (CCM), Henry Shekifu, Mbunge wa Mkinga (CCM), Dastan Kitandula, Mbunge wa Muheza (CCM), Herbert Mtangi wapo majimboni mwao wakiendelea na shughuli zao.

Imeelezwa pia kwamba wabunge Yusuph Nassir (Korogwe Mjini - CCM), Saleh Pamba (Pangani - CCM) wako Dar es Salaam wakijipanga kurudi majimboni mwao kufanya mikutano na shughuli zao za kisiasa.

Mkoani Iringa Mbunge wa Mufindi Kusini (CCM), Mendrad Kigola amerejea jana asubuhi jimboni kwake akitokea Dodoma akisema atakuwa na ratiba ya utekelezaji wa shughuli mbalimbali jimboni mwake.

Katibu wa Mbunge wa Mufindi Kaskazini, Baptist Mdede alisema bosi wake ambaye pia ni Naibu Waziri wa Maliasili na Utalii, Mahamoud Mgimwa anatarajia kurejea jimboni kwake kati ya Februari 17 na 18.

Wabunge wengine katika majimbo ya mkoa huyo bado hawajawasili kutokana na shughuli mbalimbali wanazofanya nje ya majimbo yao na Mkoa wa Iringa.

Mkoani Kilimanjaro, wabunge wawili wa kuchaguliwa kati ya tisa walikuwa wamerejea majimboni baada ya kuahirishwa kwa Bunge.
- Mwananchi