Chanongo apigwa ‘stop’ kwenda Mazembe

Mshambuliaji wa Stand United, Haruna Chanongo.

MSHAMBULIAJI wa Stand United, Haruna Chanongo, amepigwa ‘stop’ kwenda kufanya majaribio kwenye kikosi cha timu ya TP Mazembe kutokana na kocha wa timu hiyo kuwa bize kwa sasa.

Chanongo amekuwa katika mipango ya muda mrefu ya kwenda kwenye majaribio kwenye timu hiyo, lakini juzi alifunguka kuwa hawezi kwenda kwa sasa kwa kuwa kocha mkuu wa timu hiyo yupo bize na timu hiyo akiiandaa kushiriki michuano ya Ligi ya Mabingwa Afrika.

Akizungumza na Championi Jumatano, Chanongo alisema TP Mazembe imemzuia kwa muda kwenda katika majaribio ya kucheza soka la kulipwa katika timu hiyo na itampa taarifa baadaye.

“Mipango yangu ya kwenda kufanya majaribio Klabu ya TP Mazembe bado ipo ila kwa sasa nasubiri kwa muda kidogo kwanza kwani niliambiwa kocha wa timu hiyo, bado yupo bize kuwanoa nyota wake ambao wanashiriki Ligi ya Mabingwa.

“Nimeelezwa kuwa muda utakapokuwa tayari nitapewa taarifa niende lakini sasa naendelea kuitumikia timu yangu ya Stand United kwa nguvu zote ili kuona inafanya vizuri,” alisema Chanongo